ਇਮਾਨਦਾਰਬਣੋ

ਮਤੀ 5:28ਵਿੱਚ ਯਿਸੂ ਕਹਿੰਦਾ ਹੈ, "ਜੇਕਰ ਕੋਈ ਵਿਅਕਤੀ ਕਿਸੇ ਔਰਤ ਵੱਲ ਜਿਨਸੀ ਨਜ਼ਰ ਨਾਲ ਵੇਖਦਾ ਹੈ, ਤਾਂ ਉਹ ਪਹਿਲਾਂ ਹੀ ਆਪਣੇ ਦਿਲੋਂ ਉਸ ਔਰਤ ਨਾਲ ਬਦਕਾਰੀ ਦਾ ਪਾਪ ਕਰ ਚੁਕਿਆ ਹੈ। " ਸਾਨੂੰ ਇਸ ਤੋਂ ਛੁਟਕਾਰਾ ਪਾਉਣ ਲਈ ਪਰਮੇਸ਼ੁਰ ਕੋਲ ਜਾਣ ਦੀ ਲੋੜ ਹੈ, ਅਤੇ ਇਮਾਨਦਾਰ ਹੋਣਾ ਇਸ ਲਈ ਪਹਿਲਾ ਕਦਮ ਹੈ । ਜੇਕਰ ਤੁਸੀਂ ਗੁੱਸਾ ਕੀਤਾ, ਤਾਂ ਇਮਾਨਦਾਰ ਬਣੋ। ਜਿਸ ਵਿਅਕਤੀ ਨਾਲ ਤੁਸੀਂ ਗਲਤ ਕੀਤਾ, ਉਸਦੇ ਕੋਲ ਜਾਓ ਅਤੇ ਕਹੋ, "ਭਰਾ, ਮੈਨੂੰ ਮਾਫ਼ ਕਰ ਦਿਓ। ਮੈਂ ਤੁਹਾਨੂੰ ਗਲਤ ਬੋਲਿਆ, ਮੈਨੂੰ ਮਾਫ਼ ਕਰ ਦਿਓ।" ਅਤੇ ਜੇ ਤੁਸੀਂ ਦਿਨ ਵਿੱਚ ਦੱਸ ਵਾਰ ਗੁੱਸੇ ਨਾਲ ਬੋਲਣ ਦਾ ਪਾਪ ਕੀਤਾ, ਤਾਂ ਦੱਸ ਵਾਰ ਉਸਦੇ ਕੋਲ ਜਾਓ ਅਤੇ ਮਾਫ਼ੀ ਮੰਗੋ। ਜਦੋਂ ਪਰਮੇਸ਼ੁਰ ਵੇਖਦਾ ਹੈ ਕਿ ਤੁਸੀਂ ਇਮਾਨਦਾਰ ਅਤੇ ਨਿਮਰ ਹੋ, ਤਾਂ ਉਹ ਤੁਹਾਨੂੰ ਇਸ ਤੋਂ ਮੁਕਤ ਹੋਣ ਦੀ ਤਾਕਤ ਦੇਵੇਗਾ।

ਪਰ ਜੇ ਤੁਸੀਂ ਲੁਕਾਉਂਦੇ ਹੋ, ਬਹਾਨਾ ਬਣਾਉਂਦੇ ਹੋ, ਜਾਂ ਆਪਣੇ ਗੁੱਸੇ ਨੂੰ ਉਚਿਤ ਠਹਿਰਾਉਣ ਦੀ ਕੋਸ਼ਿਸ਼ ਕਰਦੇ ਹੋ, ਤਾਂ ਤੁਹਾਨੂੰ ਕਦੇ ਮੁਕਤੀ ਨਹੀਂ ਮਿਲੇਗੀ। ਤੁਹਾਡਾ ਗੁੱਸਾ ਸਿਰਫ਼ ਉਸ ਸਮੇਂ ਉਚਿਤ ਹੈ ਜਦੋਂ ਗੱਲ ਪਰਮੇਸ਼ਰ ਦੀ ਮਹਿਮਾ ਦੀ ਹੋਵੇ, ਆਪਣੇ ਆਪ ਦੀ ਨਹੀਂ।

ਜਦੋਂ ਔਰਤਾਂ ਵੱਲ ਜਿਨਸੀ ਨਜ਼ਰ ਨਾਲ ਦੇਖਣ ਦੀ ਗੱਲ ਆਉਂਦੀ ਹੈ, ਤਾਂ ਤੁਸੀਂ ਕਦੇ ਵੀ ਸਹੀ ਨਹੀਂ ਹੋ। ਤੁਸੀਂ ਆਪਣੀ ਪਤਨੀ ਨੂੰ ਦੇਖ ਕੇ ਉਸਦੀ ਪ੍ਰਸ਼ੰਸਾ ਕਰ ਸਕਦੇ ਹੋ, ਪਰ ਹੋਰ ਕਿਸੇ ਔਰਤ ਦੀ ਨਹੀਂ। ਇਹ ਪਰਮੇਸ਼ੁਰ ਦੀ ਇੱਛਾ ਨਹੀਂ। ਪਰਮੇਸ਼ੁਰ ਕਹਿੰਦਾ ਹੈ ਕਿ ਇੱਥੇ ਤੁਹਾਨੂੰ ਰੈਡੀਕਲ ਬਣਨਾ ਪਵੇਗਾ। ਸਭ ਤੋਂ ਪਹਿਲਾਂ, ਇਮਾਨਦਾਰ ਬਣੋ ਅਤੇ ਕਹੋ, "ਪ੍ਰਭੂ, ਮੈਂ ਵਿਭਚਾਰ ਕੀਤਾ।" ਕਦੇ ਵੀ ਇਹ ਨਾ ਕਹੋ ਕਿ, "ਮੈਂ ਸੋਹਣੇ ਚਿਹਰੇ ਦੀ ਪ੍ਰਸ਼ੰਸਾ ਕੀਤੀ।" ਇਸ ਦੀ ਬਜਾਇ ਕਹੋ, "ਮੈਂ ਵਿਭਚਾਰ ਕੀਤਾ।"

ਜੇ ਤੁਸੀਂ ਇਮਾਨਦਾਰ ਹੋਵੋਗੇ, ਤਾਂ ਪਰਮੇਸ਼ੁਰ ਤੁਹਾਨੂੰ ਛੁਟਕਾਰਾ ਦੇਵੇਗਾ।

ਰੈਡੀਕਲ ਬਣੋ

ਦੂਜੀ ਗੱਲ ਜਿਸ ਦਾ ਤੁਸੀਂ ਧਿਆਨ ਰੱਖਣਾ ਹੈ, ਉਹ ਹੈ ਰੈਡੀਕਲ ਬਣਨਾ। ਬਾਈਬਲ ਕਹਿੰਦੀ ਹੈ, " ਵਿਭਚਾਰ ਤੋਂ ਭੱਜੋ" (1ਕੁਰਿੰਥੀਆਂ6:18)। ਜੇ ਤੁਸੀਂ ਕੰਪਿਊਟਰ 'ਤੇ ਹੋ ਅਤੇ ਭਰਮਾਏ ਜਾ ਰਹੇ ਹੋ, ਜਾਂ ਤਾਂ ਉਥੋਂ ਭੱਜ ਜਾਓ ਜਾਂ ਕੰਪਿਊਟਰ ਬੰਦ ਕਰ ਦਿਓ ਅਤੇ ਕਹੋ: "ਪ੍ਰਭੂ, ਮੈਨੂੰ ਪਰਵਾਹ ਨਹੀਂ ਕਿ ਮੈਂ ਕੀ ਗੁਆਉਂਦਾ ਹਾਂ, ਪਰ ਮੈਂ ਇੱਥੇ ਡਿਗਣਾ ਨਹੀਂ ਚਾਹੁੰਦਾ।" ਜਦੋਂ ਯਿਸੂ ਕਹਿੰਦਾ ਹੈ, "ਜੇ ਤੇਰੀ ਸੱਜੀ ਅੱਖ ਤੈਨੂੰ ਠੋਕਰ ਖਵਾਏ, ਉਸਨੂੰ ਕੱਢ ਦੇ," ਉਹ ਸਾਨੂੰ ਭੌਤਿਕ ਤੌਰ 'ਤੇ ਸੱਜੀ ਅੱਖ ਕੱਢਣ ਲਈ ਨਹੀਂ ਕਹਿ ਰਿਹਾ। ਇਹ ਤਾਂ ਸਪੱਸ਼ਟ ਹੈ ਕਿਉਂਕਿ ਤੁਸੀਂ ਖੱਬੀ ਅੱਖ ਨਾਲ ਵੀ ਕਾਮਨਾ ਕਰ ਸਕਦੇ ਹੋ। ਇਸਦਾ ਅਰਥ ਇਹ ਹੈ ਕਿ ਤੁਹਾਨੂੰ ਪਾਪ ਦੇ ਪ੍ਰਤਿ ਆਪਣੀ ਜ਼ਬਾਨ ਅਤੇ ਆਪਣੀਆਂ ਅੱਖਾਂ ਪ੍ਰਤੀ ਸਖ਼ਤ ਅਤੇ ਰੈਡੀਕਲ ਰਵੱਈਆ ਰੱਖਣਾ ਚਾਹੀਦਾ ਹੈ।

ਜਦੋਂ ਤੁਹਾਡੀ ਅਜ਼ਮਾਇਸ਼ ਕੀਤੀ ਜਾਵੇ, ਤਾਂ ਆਪਣੇ ਆਪ ਨੂੰ ਅੰਨ੍ਹਾ ਅਤੇ ਗੂੰਗਾ ਸਮਝੋ। ਕੀ ਇੱਕ ਗੂੰਗਾ ਵਿਅਕਤੀ ਕਿਸੇ ਨਾਲ ਉੱਚੀ ਅਵਾਜ਼ ਵਿੱਚ ਗੱਲ ਕਰ ਸਕਦਾ ਹੈ? ਕੀ ਇੱਕ ਅੰਨ੍ਹਾ ਮਨੁੱਖ ਕਾਮ ਵਾਸਨਾ ਕਰ ਸਕਦਾ ਹੈ? ਨਹੀਂ। ਇੱਕ ਅੰਨ੍ਹੇ ਆਦਮੀ ਵਾਂਗ ਬਣੋ ਅਤੇ ਕਹੋ, "ਪ੍ਰਭੂ, ਤੁਸੀਂ ਮੈਨੂੰ ਔਰਤਾਂ ਦੀ ਕਾਮ ਵਾਸਨਾ ਲਈ ਅੱਖਾਂ ਨਹੀਂ ਦਿੱਤੀਆਂ। ਤੁਸੀਂ ਮੈਨੂੰ ਆਪਣੀ ਮਹਿਮਾ ਦੇਖਣ ਲਈ ਅੱਖਾਂ ਦਿੱਤੀਆਂ ਹਨ।" ਯਿਸੂ ਕਹਿੰਦਾ ਹੈ ਕਿ ਜੇ ਤੁਸੀਂ ਅਜਿਹਾ ਨਹੀਂ ਕਰਦੇ, ਇਸ ਤਰ੍ਹਾਂ ਤੁਸੀਂ ਆਪਣੇ ਸ਼ਰੀਰ ਦੇ ਭੌਤਿਕ ਅੰਗਾਂ ਨੂੰ ਤਾਂ ਸੁਰੱਖਿਅਤ ਰੱਖ ਸਕਦੇ ਹੋ, ਪਰ ਤੁਹਾਨੂੰ ਨਰਕ ਵਿੱਚ ਸੁੱਟ ਦਿੱਤਾ ਜਾਵੇਗਾ। ਇਹ ਤੁਹਾਡੇ ਲਈ ਬਿਹਤਰ ਹੈ ਕਿ ਤੁਸੀਂ ਆਪਣੇ ਸਰੀਰ ਦਾ ਇੱਕ ਹਿੱਸਾ ਗੁਆ ਦੇਵੋਂ (ਅਰਥਾਤ ਸਵੈ-ਇੱਛਾ ਨਾਲ ਉਸ ਪਾਪੀ ਸੁੱਖ ਨੂੰ ਮਾਨਣ ਤੋਂ ਮਨ੍ਹਾਂ ਕਰ ਦਿਓ ਜਿਸਦੀ ਤੁਹਾਡਾ ਸਰੀਰ ਇੱਛਾ ਕਰਦਾ ਹੈ) ਤਾਂ ਕਿ ਤੁਸੀਂ ਪਰਮੇਸ਼ਰ ਦੇ ਰਾਜ ਵਿੱਚ ਪ੍ਰਵੇਸ਼ ਕਰ ਸਕੋਂ।

ਉਸੇ ਤਰ੍ਹਾਂ, ਯਿਸੂ ਕਹਿੰਦਾ ਹੈ, "ਤੇਰਾ ਸੱਜਾ ਹੱਥ ਜਦੋਂ ਤੈਥੋਂ ਪਾਪ ਕਰਵਾਉਂਦਾ ਹੈ, ਉਸਨੂੰ ਵੱਢ ਦੇ" (ਮੱਤੀ 5:30)। ਕਲਪਨਾ ਕਰੋ ਕਿ ਤੁਹਾਡਾ ਇੱਕ ਹੱਥ ਵੱਢਿਆ ਹੋਇਆ ਹੈ ਅਤੇ ਤੁਸੀਂ ਆਪਣੇ ਸੱਜੇ ਜਾਂ ਖੱਬੇ ਹੱਥ ਨਾਲ ਪਾਪ ਨਹੀਂ ਕਰ ਸਕਦੇ। ਯਿਸੂ ਬਹੁਤ ਵਾਸਤਵਿਕ ਅਤੇ ਵਿਹਾਰਕ ਸੀ। ਯਿਸੂ ਤੁਹਾਨੂੰ ਕਹਿੰਦਾ ਹੈ ਕਿ ਤੁਸੀਂ ਇਸ ਤਰ੍ਹਾਂ ਵਿਹਾਰ ਕਰੋ ਜਿਵੇਂ ਤੁਸੀਂ ਅੰਨ੍ਹੇ ਹੋ ਅਤੇ ਤੁਹਾਡੇ ਹੱਥ ਵੱਢੇ ਹੋਏ ਹਨ ਕਿਉਂਕਿ ਪਾਪ ਬਹੁਤ ਗੰਭੀਰ ਹੈ। ਜੇ ਅਸੀਂ ਇੰਨੀ ਰੈਡੀਕਲ ਸੋਚ ਰੱਖਦੇ ਹਾਂ, ਤਾਂ ਮੈਂ ਮੰਨਦਾ ਹਾਂ ਕਿ ਪਰਮੇਸ਼ੁਰ ਸਾਨੂੰ ਪੂਰੀ ਤਰ੍ਹਾਂ ਮੁਕਤ ਕਰੇਗਾ ਅਤੇ ਸਾਡੇ ਵਿਆਹ ਵੀ ਬਿਹਤਰ ਹੋਣਗੇ। ਇਹ ਨਾ ਸੋਚੋ ਕਿ ਵਿਆਹ ਕਾਮਨਾ ਦੀ ਸਮੱਸਿਆ ਦਾ ਹੱਲ ਹੈ। ਬਹੁਤ ਸਾਰੇ ਵਿਆਹੇ ਲੋਕ ਹਰ ਰੋਜ਼ ਸੋਚਾਂ ਵਿੱਚ ਵਿਭਚਾਰ ਕਰਦੇ ਹਨ। ਕਈ ਵਿਆਹੇ ਲੋਕ ਹਰ ਰੋਜ਼ ਇੰਟਰਨੈੱਟ 'ਤੇ ਅਸ਼ਲੀਲਤਾ ਦੇਖਦੇ ਹਨ। ਵਿਆਹ ਇਸ ਸਮੱਸਿਆ ਦਾ ਹੱਲ ਨਹੀਂ, ਕਿਉਂਕਿ ਇਹ ਅੰਦਰੂਨੀ ਇੱਛਾ ਦੀ ਗੱਲ ਹੈ। ਜੇ ਤੁਸੀਂ ਪਵਿੱਤਰ ਆਤਮਾ ਦੀ ਤਾਕਤ ਨਾਲ ਇਸ ਨਾਲ ਯੁੱਧ ਨਹੀਂ ਕਰਦੇ, ਤਾਂ ਤੁਸੀਂ ਹਾਰ ਜਾਓਗੇ ਅਤੇ ਆਪਣੀ ਸਾਰੀ ਜ਼ਿੰਦਗੀ ਆਪਣੇ ਆਪ ਨੂੰ ਧੋਖਾ ਦਿੰਦੇ ਰਹੋਗੇ ਕਿ ਤੁਸੀਂ ਆਤਮਿਕ ਮਸੀਹੀ ਹੋ, ਜਦੋਂ ਕਿ ਤੁਸੀਂ ਨਹੀ ਹੋ।

ਕੀ ਯਿਸੂ ਇੱਥੇ ਕੋਈ ਮਸੀਹਤ ਦੇ ਸਨਾਤਕ ਪੱਧਰ ਦੀ ਗੱਲ ਕਰ ਰਹੇ ਹਨ? ਨਹੀਂ। ਉਹ ਸਿਰਫ਼ ਇਹ ਸਿਖਾ ਰਹੇ ਹਨ ਕਿ ਨਰਕ ਤੋਂ ਕਿਵੇਂ ਬਚਣਾ ਹੈ। ਨਰਕ ਤੋਂ ਮੁਕਤੀ ਤਾਂ ਬੁਨਿਆਦੀ ਗੱਲ ਹੈ, ਕੋਈ ਉੱਚ ਪੱਧਰੀ ਮਸੀਹੀ ਗਿਆਨ ਨਹੀਂ। ਯਿਸੂ ਕਹਿੰਦਾ ਹੈ ਕਿ ਇਹ ਬਿਹਤਰ ਹੈ ਕਿ ਤੇਰੇ ਸਰੀਰ ਦਾ ਇੱਕ ਹਿੱਸਾ ਨਾਸ਼ ਹੋ ਜਾਵੇ, ਪਰ ਤੇਰਾ ਸਾਰਾ ਸ਼ਰੀਰ ਨਰਕ ਵਿੱਚ ਨਾ ਸੁੱਟਿਆ ਜਾਵੇ। ਨਰਕ ਤੋਂ ਛੁਟਕਾਰਾ ਤਾਂ ਘੱਟੋ-ਘੱਟ ਬੁਨਿਆਦੀ ਗੱਲ ਹੈ-ਅਤੇ ਇਹ ਉਹ ਹੈ ਜੋ ਯਿਸੂ ਚਾਹੁੰਦਾ ਹੈ ਕਿ ਅਸੀਂ ਹਰ ਰਾਸ਼ਟਰ ਦੇ ਹਰ ਚੇਲੇ ਨੂੰ ਸਿਖਾਈਏ। ਪਰ ਇਹ ਸਿਖਾਇਆ ਕਿੰਨਾ ਜਾ ਰਿਹਾ ਹੈ? ਬਹੁਤ ਘੱਟ। ਅਤੇ ਇਹੀ ਕਾਰਨ ਹੈ ਕਿ ਪ੍ਰਭੂ ਨੇ ਮੈਨੂੰ ਆਪਣੇ ਸੇਵਾ-ਕਾਲ ਵਿੱਚ ਇਸ ਗੱਲ 'ਤੇ ਜ਼ੋਰ ਦੇਣ ਲਈ ਨਿਯੁਕਤ ਕੀਤਾ ਹੈ।