"ਉਸ ਦੀ ਖ਼ੂਬਸੂਰਤੀ ਦੀ ਇੱਛਾ ਨਾ ਕਰੋ, ਉਸ ਨੂੰ ਆਪਣੀਆਂ ਪਲਕਾਂ ਨਾਲ ਤੁਹਾਨੂੰ ਲੁਭਾਉਣ ਨਾ ਦਿਓ। ਕਿਉਂਕਿ ਇੱਕ ਵੇਸ਼ਵਾ ਦੀ ਕੀਮਤ ਰੋਟੀ ਦੇ ਟੁਕੜੇ ਜਿੰਨੀ ਹੀ ਹੋ ਸਕਦੀ ਹੈ, ਪਰ ਦੂਸਰੇ ਬੰਦੇ ਦੀ ਪਤਨੀ ਤੈਥੋਂ ਤੇਰੇ ਜੀਵਨ ਦੀ ਕੀਮਤ ਮੰਗੇਗੀ।" (ਕਹਾਉਤਾਂ 6:25-26 )

ਪੂਰੀ ਬਾਈਬਲ ਵਿੱਚ ਇਹ ਆਇਤ ਮੱਤੀ 5:28 ਨਾਲ ਸਭ ਤੋਂ ਨੇੜੇ ਹੈ ਜਿੱਥੇ ਲਿਖਿਆ ਹੈ ਕਿ ਆਪਣੇ ਮਨ ਵਿੱਚ ਕਿਸੇ ਇਸਤਰੀ ਦੀ ਕਾਮਨਾ ਨਾ ਕਰੋ। ਪੂਰੀ ਬਾਈਬਲ ਵਿੱਚ ਕੋਈ ਹੋਰ ਆਇਤ ਮੱਤੀ 5:28 ਇੰਨਾ ਨੇੜੇ ਨਹੀਂ ਜਿੰਨਾ ਕਹਾਉਤਾਂ 6:25 ਹੈ। ਇਹ ਨਵੇਂ ਨੇਮ ਦਾ ਇੱਕ ਪੂਰਵ-ਸੰਕੇਤ ਹੈ। ਸਿਆਣਪ ਸਾਨੂੰ ਚੇਤਾਵਨੀ ਦਿੰਦੀ ਹੈ ਕਿ ਵਿਭਚਾਰ ਦਿਲ ਵਿੱਚੋਂ ਸ਼ੁਰੂ ਹੁੰਦਾ ਹੈ। ਇਸ ਦੀ ਸ਼ੁਰੂਆਤ ਵਿਰੋਧੀ ਲਿੰਗ ਦੀ ਖ਼ੂਬਸੂਰਤੀ ਦੀ ਤਾਰੀਫ਼ ਕਰਨ ਨਾਲ ਹੁੰਦੀ ਹੈ। ਮੈਂ ਇਸ ਗੱਲ 'ਤੇ ਜ਼ੋਰ ਦੇਣਾ ਚਾਹੁੰਦਾ ਹਾਂ ਕਿਉਂਕਿ ਕੁਝ ਮਸੀਹੀ (ਵਿਸ਼ਵਾਸੀ) ਇਹ ਸਿਖਾਉਂਦੇ ਹਨ ਕਿ ਖ਼ੂਬਸੂਰਤੀ ਦੀ ਤਾਰੀਫ਼ ਕਰਨਾ ਕੋਈ ਬੁਰਾਈ ਨਹੀਂ ਹੈ। ਇਹ ਇਸ ਲਈ ਹੈ ਕਿਉਂਕਿ ਉਹਨਾਂ ਦੇ ਦਿਲ ਵਿੱਚ ਪਰਮੇਸ਼ਰ ਦਾ ਭੈ ਨਹੀਂ ਹੈ। ਪਰਮੇਸ਼ਰ ਦਾ ਬਚਨ ਆਖਦਾ ਹੈ, "ਉਸ ਦੀ ਖ਼ੂਬਸੂਰਤੀ ਦੀ ਇੱਛਾ ਨਾ ਕਰੋ।"

ਕੀ ਤੁਹਾਡੀ ਸਰੀਰਕ ਖ਼ੂਬਸੂਰਤੀ ਬਾਰੇ ਰਾਇ ਗ਼ਲਤ ਹੈ? ਕਹਾਉਤਾਂ 31:30 'ਚ ਕਿਹਾ ਗਿਆ ਹੈ ਕਿ ਸਰੀਰਕ ਖ਼ੂਬਸੂਰਤੀ ਛਲੀਆ ਹੈ ਅਤੇ ਚਲੀ ਜਾਂਦੀ ਹੈ। ਨੌਜਵਾਨੋਂ, ਮੈਂ ਤੁਹਾਨੂੰ ਇਹ ਦੱਸਣਾ ਚਾਹੁੰਦਾ ਹਾਂ ਕਿ ਜੇਕਰ ਤੁਸੀਂ ਇਸ ਗੱਲ ਦਾ ਧਿਆਨ ਨਹੀਂ ਰੱਖੋਗੇ ਕਿ ਸਰੀਰਕ ਖ਼ੂਬਸੂਰਤੀ ਛਲੀਆ ਹੈ ਅਤੇ ਸਦਾ ਨਹੀਂ ਰਹਿੰਦੀ ਤਾਂ ਤੁਸੀਂ ਇੱਕ ਦਿਨ ਇਸ ਤੋਂ ਧੋਖਾ ਖਾ ਜਾਓਗੇ। ਤੁਸੀਂ ਗ਼ਲਤ ਵਿਅਕਤੀ ਨਾਲ ਵਿਆਹ ਕਰ ਲਵੋਗੇ ਅਤੇ ਬਾਕੀ ਸਾਰੀ ਉਮਰ ਇਸ ਦਾ ਦੁੱਖ ਭੋਗਦੇ ਰਹੋਗੇ। ਆਪਣੀਆਂ ਅੱਖਾਂ ਖ਼ੂਬਸੂਰਤੀ ਵੱਲੋਂ ਮੋੜ ਕੇ ਇਹ ਨਾ ਆਖੋ, "ਚੰਗਾ, ਮੈਂ ਕੋਈ ਬੁਰੀ ਕਾਮਨਾ ਨਹੀਂ ਕਰ ਰਿਹਾ। ਮੈਂ ਤਾਂ ਸਿਰਫ਼ ਖ਼ੂਬਸੂਰਤੀ ਦੀ ਤਾਰੀਫ਼ ਕਰ ਰਿਹਾ ਹਾਂ।" ਇਹ ਇੱਕ ਬਹੁਤ ਵੱਡਾ ਧੋਖਾ ਹੈ ਅਤੇ ਪਰਮੇਸ਼ਰ ਇਸ ਨੂੰ ਵੇਖਦਾ ਹੈ! ਸ਼ਾਇਦ ਪਰਮੇਸ਼ਰ ਨੇ ਅਜਿਹੇ ਲੋਕਾਂ ਨੂੰ ਕਿਸੇ ਸੇਵਕਾਈ ਲਈ ਬੁਲਾਇਆ ਹੋਵੇ, ਪਰ ਉਹ ਉਹਨਾਂ ਨੂੰ ਇੱਕ ਪਾਸੇ ਕਰ ਕੇ ਆਖਦਾ ਹੈ, "ਤੂੰ ਇਹ ਨਹੀਂ ਕਰ ਸਕਦਾ। ਮੈਂ ਤੈਨੂੰ ਸੇਵਕਾਈ ਦੇ ਸਕਦਾ ਸੀ, ਪਰ ਤੂੰ ਆਪਣੀਆਂ ਅੱਖਾਂ ਨੂੰ ਭਟਕਣ ਦਿੱਤਾ, ਖ਼ੁਦ ਨੂੰ ਵਿਸ਼ਵਾਸੀ ਕਿਹਾ ਅਤੇ ਨਵੇਂ ਅਤੇ ਜੀਵਨ ਦੇ ਰਾਹ ਬਾਰੇ ਗੱਲਾਂ ਕਰਦਾ ਰਿਹਾ ਪਰ ਇਸ ਮਾਮਲੇ ਵਿੱਚ ਤੂੰ ਦਿਲੋਂ ਸਮਰਪਿਤ ਨਹੀਂ ਸੀ!" ਉਸ ਦੀ ਖ਼ੂਬਸੂਰਤੀ ਦੀ ਇੱਛਾ ਨਾ ਕਰ! ਇੱਥੇ ਵਿਭਚਾਰ ਦੀ ਗੱਲ ਨਹੀਂ ਹੋ ਰਹੀ। ਇੱਥੇ ਤਾਂ ਸਿਰਫ਼ ਇੱਕ ਇਸਤਰੀ ਦੀ ਸਰੀਰਕ ਖ਼ੂਬਸੂਰਤੀ ਦੀ ਤਾਰੀਫ਼ ਕਰਨ ਬਾਰੇ ਗੱਲ ਹੋ ਰਹੀ ਹੈ! ਇੱਥੇ ਕਿਹਾ ਗਿਆ ਹੈ ਕਿ ਉਸ ਦੀ ਤਾਰੀਫ਼ ਵੀ ਨਾ ਕਰੋ। ਖ਼ੈਰ, ਜੇ ਤੁਸੀਂ ਇਸ ਨੂੰ ਸਮਝਣਾ ਚਾਹੋ ਤਾਂ ਇਹ ਸਿਆਣਪ ਹੈ। ਸਾਵਧਾਨ ਰਹੋ।

ਫਿਰ ਬਚਨ ਵਿੱਚ ਕਿਹਾ ਗਿਆ ਹੈ ਕਿ "ਉਸ ਨੂੰ ਆਪਣੀਆਂ ਪਲਕਾਂ ਨਾਲ ਤੁਹਾਨੂੰ ਲੁਭਾਉਣ ਨਾ ਦਿਓ ।" ਪਰਮੇਸ਼ਰ ਦਾ ਬਚਨ ਬਹੁਤ ਵਿਹਾਰਕ ਹੈ। ਇੱਥੇ ਕਿਹਾ ਗਿਆ ਹੈ ਕਿ ਇਸਤਰੀ ਦੀਆਂ ਅੱਖਾਂ ਵਿੱਚ ਅਜਿਹੀ ਖ਼ਿੱਚ ਹੁੰਦੀ ਹੈ ਜੋ ਕਿਸੇ ਨੌਜਵਾਨ ਨੂੰ ਆਪਣੇ ਵੱਲ ਆਕਰਸ਼ਿਤ ਕਰਦੀ ਹੈ। ਅਤੇ ਇਸੇ ਲਈ ਅਸੀਂ ਵੇਖਦੇ ਹਾਂ ਕਿ ਅੱਜਕੱਲ੍ਹ ਸ਼ੈਤਾਨ ਨੇ ਕੁੜੀਆਂ ਨੂੰ ਆਪਣੀਆਂ ਅੱਖਾਂ ਅਤੇ ਪਲਕਾਂ ਦਾ ਵੱਖ-ਵੱਖ ਰੰਗਾਂ ਨਾਲ ਸ਼ਿੰਗਾਰ ਕਰਨਾ ਸਿਖਾਇਆ ਹੈ ਤਾਂ ਜੋ ਉਹ ਹੋਰ ਵੀ ਆਕਰਸ਼ਕ ਦਿਖਾਈ ਦੇਣ। ਅਤੇ ਜੇ ਤੁਸੀਂ ਉਹਨਾਂ ਵਿੱਚੋਂ ਹੋ ਜੋ ਆਪਣੇ ਹੱਥ ਉੱਤੇ ਜਾਨਵਰ ਦਾ ਨਿਸ਼ਾਨ ਰੱਖ ਕੇ ਵੀ ਸਭਾ ਵਿੱਚ ਚੰਗੀ ਗਵਾਹੀ ਦੇਣਾ ਚਾਹੁੰਦੇ ਹੋ, ਤਾਂ ਮੇਰਾ ਅਨੁਮਾਨ ਹੈ ਕਿ ਸ਼ਾਇਦ ਅਜਿਹੇ ਰੰਗਹੀਣ ਪ੍ਰਸਾਧਨ ਵੀ ਹੋਣਗੇ ਜਿਨ੍ਹਾਂ ਨੂੰ ਤੁਸੀਂ ਆਪਣੀਆਂ ਅੱਖਾਂ, ਬੁੱਲ੍ਹਾਂ ਅਤੇ ਸਰੀਰ ਦੇ ਹੋਰ ਹਿੱਸਿਆਂ ਉੱਤੇ ਲਗਾ ਕੇ ਆਪਣੇ ਆਪ ਨੂੰ ਹੋਰ ਆਕਰਸ਼ਕ ਬਣਾ ਸਕਦੇ ਹੋ। ਪਰ ਇੱਥੇ ਪਰਮੇਸ਼ਰ ਦੇ ਬਚਨ ਵਿੱਚ ਸਾਫ਼ ਕਿਹਾ ਗਿਆ ਹੈ ਕਿ, "ਉਸ ਨੂੰ ਆਪਣੀਆਂ ਪਲਕਾਂ ਨਾਲ ਤੁਹਾਨੂੰ ਲੁਭਾਉਣ ਨਾ ਦਿਓ ।"

ਮੈਂ ਤੁਹਾਨੂੰ ਰਾਜਿਆਂਦੀ ਦੂਜੀ ਪੋਥੀ 9:30 ਦੀ ਇੱਕ ਆਇਤ ਵਿਖਾਉਣੀ ਚਾਹੁੰਦਾ ਹਾਂ ਜਿਸ ਵਿੱਚ ਸ਼ਿੰਗਾਰੇ ਹੋਏ ਚਿਹਰੇ ਵਾਲੀ ਇੱਕ ਇਸਤਰੀ ਦਾ ਜ਼ਿਕਰ ਹੈ। ਉਹ ਈਜ਼ਬਲ ਹੈ। ਤੁਸੀਂ ਉਸ ਬਾਰੇ ਪਰਕਾਸ਼ ਦੀ ਪੋਥੀ ਦੇ ਅਧਿਆਇ 2 ਵਿੱਚ ਵੀ ਪੜ੍ਹਦੇ ਹੋ। ਥੂਆਤੀਰਾ ਦੀ ਕਲੀਸਿਯਾ ਵਿੱਚ ਇੱਕ ਈਜ਼ਬਲ ਬੈਠੀ ਹੋਈ ਹੈ। ਰਾਜਿਆਂ ਦੀ ਦੂਜੀ ਪੋਥੀ 9 ਵਿੱਚ ਲਿਖਿਆ ਹੈ ਕਿ ਜਦੋਂ ਯੇਹੂ ਯਿਜ਼ਰੇਲ ਆਇਆ ਤਾਂ ਈਜ਼ਬਲ ਨੇ ਇਹ ਸੁਣਿਆ ਤਾਂ ਉਸ ਨੇ ਆਪਣੀਆਂ ਅੱਖਾਂ ਵਿੱਚ ਕੱਜਲ ਪਾਇਆ ਅਤੇ ਆਪਣੇ ਵਾਲਾਂ ਨੂੰ ਸ਼ਿੰਗਾਰਿਆ। ਕੀ ਤੁਹਾਨੂੰ ਪਤਾ ਹੈ ਕਿ ਮਸੀਹ ਤੋਂ ਸੈਂਕੜੇ ਸਾਲ ਪਹਿਲਾਂ ਵੀ ਕੱਜਲ ਵਰਤਿਆ ਜਾਂਦਾ ਸੀ? ਇਹ 20ਵੀਂ ਸਦੀ ਦੀ ਕਾਢ ਨਹੀਂ ਹੈ। ਈਜ਼ਬਲ ਹੀ ਉਹ ਸੀ ਜਿਸ ਨੇ ਇਸ ਉਤਪਾਦ ਦੀ ਸ਼ੁਰੂਆਤ ਕੀਤੀ। ਉਸ ਨੇ ਆਪਣੀਆਂ ਅੱਖਾਂ ਵਿੱਚ ਕੱਜਲ ਪਾਇਆ ਅਤੇ ਆਪਣੇ ਵਾਲਾਂ ਨੂੰ ਸ਼ਿੰਗਾਰਿਆ। । ਮੈਨੂੰ ਯਕੀਨ ਹੈ ਕਿ ਉਸ ਨੇ ਆਪਣੇ ਚਿਹਰੇ ਦੇ ਬਾਕੀ ਹਿੱਸੇ ਨੂੰ ਵੀ ਸ਼ਿੰਗਾਰਿਆ ਹੋਵੇਗਾ। ਫਿਰ ਉਹ ਖਿੜਕੀ ਵਿੱਚੋਂ ਬਾਹਰ ਵੇਖਣ ਲੱਗੀ ਅਤੇ ਯੇਹੂ ਨੇ ਆਇਤ 33 ਵਿੱਚ ਆਖਿਆ, "ਉਸ ਨੂੰ ਹੇਠਾਂ ਸੁੱਟ ਦਿਓ!", ਅਤੇ ਉਹਨਾਂ ਨੇ ਉਸ ਨੂੰ ਹੇਠਾਂ ਸੁੱਟ ਦਿੱਤਾ ਅਤੇ ਜਾਨੋਂ ਮਾਰ ਦਿੱਤਾ। ਉਹ ਸ਼ਿੰਗਾਰੇ ਹੋਏ ਚਿਹਰੇ ਤੋਂ ਪ੍ਰਭਾਵਿਤ ਨਹੀਂ ਹੋਇਆ ਅਤੇ ਤੁਹਾਨੂੰ ਵੀ ਨਹੀਂ ਹੋਣਾ ਚਾਹੀਦਾ। ਯੇਹੂ ਪਰਮੇਸ਼ਰ ਦਾ ਭੈ ਮੰਨਣ ਵਾਲਾ ਮਨੁੱਖ ਵੀ ਨਹੀਂ ਸੀ ਫਿਰ ਵੀ ਉਹ ਇਸ ਸਭ ਦੇ ਪ੍ਰਭਾਵ ਹੇਠ ਨਹੀਂ ਆਇਆ। ਸ਼ਿੰਗਾਰੇ ਹੋਏ ਚਿਹਰਿਆਂ ਦੇ ਮਾਮਲੇ ਵਿੱਚ, ਖ਼ਾਸ ਕਰਕੇ ਪਲਕਾਂ ਦੇ ਸ਼ਿੰਗਾਰ ਦੇ ਸੰਬੰਧ ਵਿੱਚ, ਸਾਵਧਾਨ ਰਹੋ।

ਸੁਲੇਮਾਨ ਵਾਂਗ ਮੈਂ ਵੀ ਨੌਜਵਾਨਾਂ ਨੂੰ ਵਾਰ-ਵਾਰ ਇਹ ਚੇਤਾਵਨੀ ਦਿੰਦਿਆਂ ਨਹੀਂ ਥੱਕਦਾ ਕਿ ਉਹਨਾਂ ਨੂੰ ਵਿਰੋਧੀ ਲਿੰਗ ਨਾਲ ਆਪਣੇ ਸੰਬੰਧਾਂ ਦੇ ਮਾਮਲੇ ਵਿੱਚ ਖ਼ਾਸ ਤੌਰ 'ਤੇ ਸਾਵਧਾਨ ਰਹਿਣ ਚਾਹੀਦਾ ਹੈ। ਜੇ ਤੁਸੀਂ ਪਰਮੇਸ਼ਰ ਦੇ ਬਚਨ ਅੱਗੇ ਕੰਬਦੇ ਹੋ ਅਤੇ ਉਸ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋ, ਤਾਂ ਉਹ ਤੁਹਾਨੂੰ ਅਜਿਹੀ ਇਸਤਰੀ ਤੋਂ ਬਚਾ ਕੇ ਰੱਖੇਗਾ ਜੋ ਤੁਹਾਡੇ ਜੀਵਨ ਨੂੰ ਬਰਬਾਦ ਕਰਨ ਅਤੇ ਨਸ਼ਟ ਕਰਨ ਲਈ ਸ਼ੈਤਾਨ ਦਾ ਸਾਧਨ ਬਣ ਸਕਦੀ ਹੈ। ਅਤੇ ਜੇ ਸ਼ੈਤਾਨ ਤੁਹਾਡੇ ਜੀਵਨ ਨੂੰ ਬਰਬਾਦ ਕਰਨ ਅਤੇ ਨਸ਼ਟ ਕਰਨ ਵਿੱਚ ਸਫਲ ਨਾ ਵੀ ਹੋਵੇ, ਤਾਂ ਘੱਟੋ-ਘੱਟ ਉਹ ਪਰਮੇਸ਼ਰ ਦੇ ਸੇਵਕ ਵਜੋਂ ਤੁਹਾਡੀ ਆਤਮਿਕ ਉਪਯੋਗਤਾ ਨੂੰ ਨਸ਼ਟ ਕਰਨ ਦੀ ਕੋਸ਼ਿਸ਼ ਤਾਂ ਜ਼ਰੂਰ ਕਰੇਗਾ। ਕੁਝ ਲੋਕ ਅਜਿਹੇ ਵੀ ਹਨ ਜੋ ਮੁਕਤੀ ਤਾਂ ਪਾ ਚੁੱਕੇ ਹਨ, ਪਰ ਫਿਰ ਵੀ ਇਸਤਰੀਆਂ ਨਾਲ ਅਣਉਚਿਤ ਸੰਬੰਧਾਂ ਵਿੱਚ ਪੈ ਜਾਂਦੇ ਹਨ ਅਤੇ ਇਸ ਕਾਰਨ ਉਹ ਉਸ ਸੇਵਕਾਈ ਤੋਂ ਵਾਂਝੇ ਰਹਿ ਗਏ ਜੋ ਪਰਮੇਸ਼ਰ ਉਹਨਾਂ ਨੂੰ ਦੇਣਾ ਚਾਹੁੰਦਾ ਸੀ। ਇਹ ਅਜਿਹੀ ਗੱਲ ਹੈ ਜਿਸ ਨੂੰ ਸਾਨੂੰ ਬਹੁਤ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਸਿਰਫ਼ ਇਹ ਕਹਿ ਦੇਣਾ ਹੀ ਕਾਫ਼ੀ ਨਹੀਂ ਕਿ, "ਮੇਰੇ ਪਾਪ ਮਾਫ਼ ਹੋ ਗਏ ਹਨ।" ਜ਼ਰਾ ਸੋਚੋ ਕਿ ਅਨੰਤਕਾਲ ਵਿੱਚ ਖੜ੍ਹੇ ਹੋ ਕੇ ਇਹ ਪਤਾ ਲੱਗੇ ਕਿ ਪਰਮੇਸ਼ਰ ਕੋਲ ਤੁਹਾਡੇ ਲਈ ਇੱਕ ਸੇਵਕਾਈ ਸੀ ਅਤੇ ਤੁਸੀਂ ਇਸ ਨੂੰ ਸਿਰਫ਼ ਇਸ ਲਈ ਗੁਆ ਦਿੱਤਾ ਕਿਉਂਕਿ ਤੁਸੀਂ ਵਿਰੋਧੀ ਲਿੰਗ ਨਾਲ ਆਪਣੇ ਸੰਬੰਧਾਂ ਦੇ ਮਾਮਲੇ ਵਿੱਚ ਸਾਵਧਾਨ ਨਹੀਂ ਸੀ। ਜ਼ਰਾ ਸੋਚੋ ਕਿ ਅਨੰਤਕਾਲ ਵਿੱਚ ਖੜ੍ਹੇ ਹੋ ਕੇ ਕਿਸੇ ਮਾਮੂਲੀ ਜਿਹੇ ਸੁੱਖ ਅਤੇ ਕਿਸੇ ਮੂਰਖਤਾਪੂਰਨ ਰਿਸ਼ਤੇ ਦੀ ਖ਼ਾਤਰ ਤੁਸੀਂ ਉਹ ਸੇਵਕਾਈ ਗੁਆ ਬੈਠੇ ਜੋ ਤੁਹਾਡੀ ਸਾਰੀ ਅਨੰਤਤਾ ਨੂੰ ਮਹਿਮਾ ਮਈ ਬਣਾ ਸਕਦੀ ਸੀ। ਪਰ ਤੁਸੀਂ ਉਹ ਇਸ ਲਈ ਗੁਆ ਦਿੱਤੀ ਕਿਉਂਕਿ ਧਰਤੀ 'ਤੇ ਤੁਸੀਂ ਮੂਰਖਤਾ ਨਾਲ ਕੰਮ ਲਿਆ। ਜ਼ਰਾ ਸੋਚੋ, ਉਸ ਦਿਨ ਕਿੰਨੇ ਹੀ ਲੋਕਾਂ ਦੇ ਦਿਲਾਂ ਵਿੱਚ ਕਿੰਨਾ ਗਹਿਰਾ ਪਛਤਾਵਾ ਹੋਵੇਗਾ।

ਖ਼ਾਸ ਕਰਕੇ ਜਦੋਂ ਤੁਸੀਂ ਜਵਾਨ ਹੋ, ਸਾਵਧਾਨ ਰਹੋ।